Que Lorena Álvarez pisara l’escenariu del Prestoso yera daqué que tenía que pasar más tarde o más llueu. La de Santantolín (Ibias) fai parte d’esa castra d’artistes malos de clasificar porque la so obra nun se da a la de dexase llendar por una etiqueta.

«Un versu llibre dientro del panorama musical español», «cantautora punk», «un alma inquieta que destila espontaneidá», o «referente de la canción d’autora contemporánea» son delles de las calificaciones de les que foi oxetu, pero ella esmuzse, aneciando en nun volvese una lleona domesticada obligada a pasar per un aru en llames y sigue’l so camín, llibre, abriéndolu al ella pasar col enfotu de que la poesía y la música tovía tienen daqué que dicir nestos tiempos y, sobre manera, que l’arte nun se topa onde nos quieren facer creer que ta.

Llega presentando El poder sobre una misma (Montgri, 2025), onde viaxa al traviés de composiciones testerones, iróniques y paisxístiques pa dexanos acolumbrar, dende dientro, el procesu de rotura y recomposición d’una a favor de sigo mesma.