Col so primer trabayu, 'What do you do all day?'. los de Manchester recuperen y axunten lo meyor del jangle de los 80 con esos xuegos vocales mozu/moza que tanto nos presten. A la griesca contra’l machismu post-punk de la so ciudá, Autocamper llega pa trunfar a güelpe de guitarres y melodíes.

Pa los fans de Heavenly, Camera Obscura o Orange Juice, estos rapazos mancunianos actualicen la fórmula del indiepop más canónico pa ufiertar una colección de cantares que los fixeron destacar perriba d’otres bandes asemeyaes y ser abanderaos d’una xeneración nueva. Cola guitarra de doce cuerdes de Jack Harkins sobresaliendo sobre los demás instrumentos, en directo son a convertir el so soníu en dalgo más cercano al shoegaze y llevantar una muria de soníu alredor de la melodía.

Como especifiquen nel so bandcamp: “not twee, not anorak, not lucky, just POP”.