El Festival de Música Independiente nel Paraísu Natural, gústanos dicir eso sobro'l nuesu festival, y ye que'l mayor activu co'l que cunta'l Prestoso Fest ye, ensin batura a dudes, la so redolada. La cabeza de cartel suañáu pa un eventu d'estes característiques.
El llugar escoyíu para llevar a cabu'l festival ye una declaración d'intenciones al respective de otru de los compromisos que sofiten la propuesta, la cohesión territorial.
Allugada nel suroccidente asturianu esti rincón del Cordal Cantábricu tapiza con frondosos montes les montascoses fasteres onde l'agua ye la protagonista. Una estensa rede fluvial percuerre los fondos y entrevesgaos valles de Cangas, Degaña y Ibias.
Un territoriu con una abondosa riqueza natural caltenida pol Parque Natural de les Fontes del Narcea, Degaña e Ibias, n'el que los sos llendes atópase unu de los pulmones verdes d'Asturies, la Reserva Natural Integral de Muniellos, considerá la mayor carbayera d'Europa.
La perfecta combinación ente les tradiciones humanes y el caltenimientu del mediu natural dexó la convivencia cola fauna selvaxe tan emblemática como l'osu pardu cantábricu. La so observación ye posible en ciertes époques del añu.
El suroccidente asturianu ye'l paraísu de los viñeos de monte, que'l so cultivu remontase a la Edá Media. Les sos viñes abancalaes conviven con un paisaxe abruptu, d'empinaes fasteres y cepes centenaries. El so vinu, peculiar y únicu, ye ellaboráu de manera tradicional amosando procesos innovaores qu'aseguren un productu calidable reconocíu na actualidá cola denominación D.O.P. Cangas. Un vinu qu'atesora colores, arumes y sabores de la tierra que los ve nacer.
Apúntate al enoturismo n'Asturies visitando viñeos y bodegues, conociendo'l Muséu del Vinu de Cangas nel popular barriu de Santiso, y participa na vendimia cada mes d'ochobre.
A esti panorama d'esperiencies xúnense otres como esfrutar d'un cuidáu paisaxe, que gracies a los antiguos pobladores heredemos una rica amuesa de patrimoniu rural. Túmulos, dólmenes y castros, como'l de Seroiro y Pradias en Ibias, falen del nuesu pasáu neolíticu. Los restos de la estracción aurífera romana en Cecos, El Corralín o San Pedro de los Montes cúntente como'l so pasu camudó la fisionomía de los nuesos montes. La Edá Media déxanos antiguos señoríos reflexao en palacios y casones rurales, dalgunes d'elles presentes nel Cascu históricu de la Villa de Cangas o na fundación del Monesteriu de Corias, instalaciones que puedes esfrutar como'l Parador Nacional.
Otros pueblos de la contorna son polu d'atracción: Bisuyu, llugar natal del dramaturgu Alejandro Casona; Ḷḷames del Mouru, pola so famosa cerámica negra; los pueblos emparraos como Riodeporcos, Uría, o Alguerdo en Ibias; o afayar la tierra de los Cunqueiros o Tixileiros artesanos de la madera, que'l so únicu artesanu vas poder atopalo en Trabáu, Degaña.
Perdese nos nuesos pueblos dexa afayar horros teitaos, palloces, palacios, casones, onde se atopa la forma de vida de los nuesos predecesores nes distintes etapes de la hestoria.
El sur de la contorna ufierta espectaculares paisaxes devalles d'orixe glaciar como'l Valle de Degaña o les vistes dende'l Cuetu d'Arbas sobro'l valle de Naviegu. Autenticidá d'una contorna que amuesa a la perfección naturaleza y etnografía.
Los tres conceyos componen un escenariu de montes, montes de suañu, ríos, regueros y fontes, que son un verdaderu paraísu natural, de riqueza mineral, un espaciu d'oficios casi pa l'alcordanza, de xentes comunicatives y atentes, onde en cada casa surde un amigu platigueru…
La contorna ocupa un ampliu territoriu nel estremu suroccidental d'Asturies, formá po los conceyos de Degaña, Ibias, y Cangas. Esti postreru ye'l más estensu del Principáu d'Asturies.
